ឃាតកម្មយ៉ាងសាហាវព្រៃផ្សៃសម្លាប់២នាក់ប្ដីប្រពន្ធ នៅភូមិ៥ ឃុំរការខ្នុរ ស្រុកក្រូចឆ្មារ ​ត្រូវកម្លាំងនគរបាលខេត្តត្បូងឃ្មុំបង្ក្រាបបាន ហើយនៅថ្ងៃទី៣០ ខែតុលា ឆ្នាំ២០១៧នេះ សាលាដំបូងខេត្តចេញដីកាបង្គាប់ឲ្យឃុំខ្លួនដាក់ពន្ធនាគារ។

លោកឧត្តមសេនីយ៍ទោ បែន រ័ត្ន ស្នងការនគរបាលខេត្តត្បូងឃ្មុំ ដែលបានដឹកនាំបញ្ជាប្រតិបត្តិការនេះ បានឲ្យដឹងថា ជនសង្ស័យដែលបង្ក្រាបនេះ ​ទី១៖ឈ្មោះ ជ្រូក ចាន់ អាយុ៤៤ឆ្នាំ នៅភូមិ៧​ ឃុំរការខ្នុរ ស្រុកក្រូចឆ្មារ​ (ចម្ងាយប្រមាណ១គីឡូម៉ែត្រ ពីផ្ទះជនរងគ្រោះ) ដោយជននេះធ្លាប់ជាប់ពន្ធនាគារចំនួន២លើក ពីបទលួច និងប្លន់ (១៩៨៩ម្តង និង២០១២ម្តង) ហើយ​ត្រូវបាននគរបាលឃាត់ខ្លួនខណៈកំពុងឆក់ត្រីតាមដងទន្លេ និងជនសង្ស័យទី២៖​ឈ្មោះ មួន ជ្រាយ អាយុ​៤១ឆ្នាំទីលំនៅក្បែរផ្ទះ ជ្រូក ចាន់​។ គេជាមុខសញ្ញាលួចប្លប់ជាមួយជ្រូក ចាន់ កាលពីឆ្នាំ២០១២ ទើបនិងចូលមកមូលដ្ឋានវិញថ្មីៗ។

បើតាមលោកឧត្តមសេនីយ៍ស្នងការ ក្រោយបង្ក្រាបបានកម្លាំងនគរបាលជំនាញដកហូតបាន ដាវ​១ដើម ជាប់ស្នាមឈាមមនុស្ស និងទើបលាងសម្អាតតែមិនជ្រះ, កណ្តៀវ​១ ជាប់ស្នាមឈាមហើយទើបសំលៀងបន្ថែមថ្មីៗ, កាំបិតផ្គាក់ផ្លែត្រង់​១ជាប់ស្នាមឈាមមនុស្ស, សំណាកនៅលើដីក្បែរអាងទឹក ផ្ទះជនសង្ស័យមានស្នាមឈាម ដែលលាងដាវលាងកាំបិត។

ក្រោយឃាត់ខ្លួន និងការកសាងសំណុំរឿងបញ្ជូនទៅតុលាការហើយ នៅថ្ងៃទី៣០ ខែតុលា ឆ្នាំ២០១៧នេះ តុលាការបានសម្រេចចេញដីកាបង្គាប់ឲ្យឃុំខ្លួនជនសង្ស័យទាំង២នាក់នេះ ដាក់ពន្ធនាគារតែម្ដង។

ជុំវិញករណីឃាតកម្មដ៏សាហាវនេះ ត្រូវបានលោកឧត្តមសេនីយ៍ទោ ប៉ែន រ័ត្ន ស្នងការនគរបាលខេត្តត្បូងឃ្មុំ ប្រាប់មកអង្គភាពព័ត៌មាន Fresh Newsថា កើតឡើងនៅយប់ថ្ងៃទី២០ ខែតុលា ឆ្នាំ២០១៧នេះ នៅភូមិទី៥ ឃុំរការខ្នុរ ស្រុកក្រូចឆ្នារ ដោយបន្សល់ទុកកូន២នាក់ ម្នាក់ស្រី និងម្នាក់ទៀតប្រុសឲ្យនៅកំព្រាឯការគ្មានមេបា​៕

ប្រភព : Fresh News

តុលាការសម្រេចដោះលែង ក្រុមអ្នកខ្លាំងករណីជម្លោះប្រើហិង្សា គ្រាន់តែស្តោះទឹកមាត់ និងសម្លឹងមុខគ្នា ឲ្យមានសេរីភាពវិញ

(ភ្នំពេញ)៖ បន្ទាប់ពីសាកសួររួចលោក ខៀវ កូឡា ព្រះរាជអាជ្ញាររង អមសាលាដំបូងរាជធានីភ្នំពេញ បានសម្រេចដោះលែង ជនសង្ស័យ០៤នាក់ ពាក់ព័ន្ធករណីហិង្សា ដោយចេតនាលើគ្នាទៅវិញទៅមក ឲ្យមានសេរីភាពឡើងវិញ​។

បើតាមមន្ដ្រីតុលាការ ​ការដោះលែងនេះ ធ្វើឡើងនៅ​ល្ងាច ថ្ងៃទី២៨ ខែតុលា ឆ្នាំ២០១៧ គឺក្រោយមួយថ្ងៃដែលសមត្ថកិច្ចអាវុធ ហត្ថរាជធានីភ្នំពេញ បានបញ្ជូនជនសង្ស័យ០៤នាក់ ជាគូបដិបក្ខវាយប្រហារគ្នាទៅវិញទៅមក ដើម្បីឲ្យតុលាការ ដើម្បីផ្តន្ទាទោសតាមច្បាប់​។

តាមសមត្ថកិច្ចបញ្ជាក់ថា ករណីនេះបង្ក​ឡើងដោយភាគីពីរក្រុមមានជម្លោះគ្នា ភាគីទី១មានគ្នា០២នាក់ គឺឈ្មោះ យ៉ែម ពេជ្រ ភេទប្រុស អាយុ២០ឆ្នាំ មុខរបរលក់អង្ករ ស្រុកកំណើតភ្នំពេញ បច្ចុប្បន្នស្នាក់នៅផ្ទះលេខ២២៩ ភូមិឬស្សី សង្កាត់ស្ទឹងមានជ័យ ខណ្ឌមានជ័យ និង​ឈ្មោះ សុខ វណ្ណី ភេទប្រុស អាយុ២០ឆ្នាំ មុខរបរលក់ហ្គាស ស្រុកកំណើតភ្នំពេញ បច្ចុប្បន្នស្នាក់នៅភូមិឬស្សី សង្កាត់ស្ទឹងមានជ័យ ខណ្ឌមានជ័យ ឯភាគីម្ខាងទៀតមានគ្នា០២នាក់ដែរ គឺឈ្មោះ ស៊ឹម វិបុល ភេទប្រុស អាយុ៣១ឆ្នាំ មុខរបរកម្មកររោងចក្រ ស្រុកកំណើតខេត្តត្បូងឃ្មុំ បច្ចុប្បន្ន​រស់នៅភូមិឬស្សី សង្កាត់ស្ទឹងមានជ័យ ខណ្ឌមានជ័យ និងឈ្មោះ វ៉ង ចន្ថា ភេទប្រុស អាយុ២៨ឆ្នាំ មុខរបរកម្មករសំណង់ ស្រុកកំណើតខេត្តព្រៃវែង បច្ចុប្បន្នរស់នៅភូមិឬស្សី សង្កាត់ស្ទឹងមានជ័យ ខណ្ឌមានជ័យ​។

អង្គហេតុដែលនាំឲ្យមានជម្លោះកើតឡើង គឺដំបូងឡើយផ្តើមចេញពី​ភាគីទាំងពីរ បានផឹកស៊ីនៅកន្លែងពីរផ្សេងគ្នា ដោយភាគីទី១ ផឹកគ្នា០២នាក់ ឯភាគីទី២ផឹកគ្នា០៦នាក់។ បន្ទាប់មកឈ្មោះ សុខ វណ្ណី នៅភាគីទី១​បានងើបយកលុយលក់អង្ករទៅប្រគលឲ្យបងស្រី នៅផ្ទះក្បែរគ្នានឹងកន្លែងផឹកស៊ី ក៏បានជួបនឹងឈ្មោះ ស៊ឹម វិបុល នៅភាគីទី២ ដែលងើបចេញពីកន្លែងផឹងស៊ីផ្សេងមួយទៀត​ដើម្បីទៅហៅកូន​ពេលដើរជួបគ្នា ឈ្មោះ ស៊ឹម វិបុល ក៏បានស្តោះទឹកមាត់ និងសម្លឹងមុខឈ្មោះ សុខ វណ្ណី បណ្តាលឲ្យមានការឈ្លោះប្រកែកគ្នាតាមពាក្យសម្តីខ្លាំងៗ ហើយក៏ត្រឡប់ទៅអង្គុយកន្លែង ផឹកស៊ីរាងៗខ្លួនវិញ។

តែដោយឈ្មោះ សុខ វណ្ណី មិនសុខចិត្តក៏រ៉ាយរ៉ាប់ប្រាប់ដល់មិត្តភក្តិខ្លួន ឈ្មោះ យ៉ែម ពេជ្រ បណ្តាលឲ្យមានការឈ្លោះប្រកែកគ្នាបន្ត រហូតឈានដល់ការយកដំបង ដុំថ្ម គប់គ្នាទៅវិញទៅមក ផ្អើលដល់អ្នកជិតខាង មកប្តឹងសមត្ថកិច្ចអាវុធហត្ថខណ្ឌមានជ័យ ចុះទៅហាមឃាត់ តែភាគីទាំងពីរមិនព្រមស្តាប់ ទើបសមត្ថកិច្ចអាវុធហត្ថឃាត់ខ្លួនភាគីទាំងពីរបក្ខ​មកសម្រុះសម្រួលគ្នាតែម្តង។

ក្រោយពេលស្រាវជ្រាវសមត្ថកិច្ចអាវុធហត្ថបានរកឃើញថា ជនសង្ស័យទាំងពីរបក្ខ​គឺជាក្រុមអន្ធពាល ដែលតែងតែបង្កការភ័យខ្លាចដល់ប្រជាពលរដ្ឋ ព្រមទាំងវាយតប់បង្ករបួសស្នាម ដល់អ្នកជិតខាងជាញឹកញាប់ ដោយប្រើ​កាំបិត ដំបង ដុំថ្ម បង្កឲ្យអ្នកជិតខាងមានរបួស ជាច្រើនករណីរួចមកហើយ ទើបសមត្ថកិច្ចជំនាញ នៃកងរាជអាវុធហត្ថរាជធានីភ្នំពេញ កសាងសំណុំរឿង​បញ្ជូនជនសង្ស័យទាំង៤នាក់ ទៅកាន់តុលាការព្រមគ្នា ដើម្បីឲ្យព្រះរាជអាជ្ញាធ្វើការចោទប្រកាន់ និងផ្តន្ទាទោសតាមច្បាប់៕

ប្រភព៖freshnews