តើលោក ដាប ឈួន ជានរណា ?(មានវីដេអូ)
អតីតចៅហ្វាយខេត្តសៀមរាប និងកំពង់ធំ លោក ដាប ឈួន ហៅម្ជុលពេជ្រ លោក ដាប ឈួន មានស្រុកកំណើតនៅខេត្តកំពង់ធំ ។ ឪពុកឈ្មោះ គឹម រាល ម្តាយឈ្មោះ យឹម។ លោក គឹម រាល និង យឹម មានកូនប្រាំពីរនាក់ ប្រុសប្រាំនាក់ ស្រីពីរនាក់ ហើយកូនប្រុសទី២ មានឈ្មោះ គឹម ឈួន ហៅ ដាប ឈួន។ លោកគឹម ឈួន ហៅ ដាប ឈួន ជាពលបាលត្រី ទ័ពថៃ តែត្រូវបានបោះបង់តំណែងនេះ នៅឆ្នាំ ១៩៤៤។
លោក ដាប ឈួន បានជាប់ឈ្មោះថា ក្បត់នឹងសម្តេចព្រះបាទ នរោត្តមសីហនុ (ព្រះបរមរតនកោដ្ឋ) ហើយគេគ្រប់គ្នាល្បីថា លោកចេះមន្តអាគមកាប់មិនមុតដុតមិនឆេះនោះ ត្រូវបានគេដឹងថា លោក ដាប ឈួន មានជំនឿ និងគោរពបូជាយ៉ាងងប់ងុលនឹងបារមីព្រះអង្គចេកព្រះអង្គចម។
ក្នុងអំឡុងពេល ដែលតំបន់អង្គរត្រូវបានគេបោះបង់ចោល រូបសំណាកព្រះអង្គចេក ព្រះអង្គចម ក៏បានបាត់មួយរយៈ តែរូបសំណាកទាំងពីរនេះ ត្រូវបានរកឃើញឡើងវិញក្នុងឆ្នាំ១៩៥០ នៅក្នុងព្រៃម្ដុំក្រុងអង្គរធំ ដោយក្រុមមន្ត្រីអភិរក្សអង្គរ ខេត្តសៀមរាប ដែលគេជឿថា រូបព្រះអង្គចេក ព្រះអង្គចម កាលពីដើមត្រូវបានតម្កល់ទុកនៅក្នុងប្រាសាទអង្គរវត្ត។
តាមកំណត់ ត្រា និងសាក្សីមួយចំនួនបានឲ្យដឹងថា លោកឧត្ដមសេនីយ៍ ម្ជុលពេជ្រ ដាប ឈួន ឬហៅថា ដាប ឈួន ដែលជាចៅហ្វាយខេត្តសៀមរាប និងខេត្តកំពង់ធំ ត្រូវបានសម្ដេចព្រះបាទនរោត្ដម សីហនុ ប្រទានតំណែងឲ្យគ្រប់គ្រងនៅខេត្តទាំងពីរ បន្ទាប់ពីបានទទួលឯករាជ្យពីបារាំង នៅឆ្នាំ១៩៥៣។
លោក ដាប ឈួន ជាពលបាលត្រីទ័ពថៃ តែបានបោះបង់ដំណែងនេះនៅឆ្នាំ១៩៤៤។ នៅស្រុកខ្មែរ មានចលនាទាមទារឯករាជ្យពីបារាំង មានឈ្មោះថា ឥស្សរៈ។ ដាប ឈួន ជាខ្មែរឥស្សរៈដំបូងគេ ក្នុងចំណោម ខ្មែរឥស្សរៈផ្សេងៗទៀតដូចជាៈ ហែម សាវ៉ាង, ហែម សាវ៉ែន, សារូ, នរោត្តម ចន្ទរង្សី ។ល។ ចលនានេះទទួលការគាំទ្រពីថៃ និង វៀតមិញ ។
នៅថ្ងៃទី៧ ខែមេសា ឆ្នមាំ១៩៤៦ ខ្មែរឥស្សរៈមានចំនួន ៣០០នាក់ បានវាយប្រហារលើកទី១ លើបារាំងនៅក្រុងសៀមរាបអង្គរ ។ ខ្មែរឥស្សរៈបានវាយកាន់កាប់ ក្រុងសៀមរាបអង្គរ ចំនួន ៦ថ្ងៃ និងសម្លាប់នាយទាហានបារាំង ៧នាក់ ។ ដាប ឈួន បន្ទាប់ពីប្រមូល អាវុធ ស្បៀង គ្រាប់រំសេវ ដែលជាជ័យភ័ណ្ឌសង្គ្រាម បានមួយចំនួនរួចហើយក៏ដកខ្លួនថយជាមួយក្រុមខ្លួន នៅម្ដុំភ្នំគូលែន ។
បន្តមកទៀតនៅថ្ងៃទី១ ខែតុលា ឆ្នាំ១៩៤៨ ដោយសារការចរចារ ដាប ឈួន បានដាក់អាវុធ ចុះចូលជាមួយ រាជរដ្ឋាភិបាល តែគាត់នៅតែ រក្សារអំណាចដូច ស្ដេចត្រាញ់ ត្រួតត្រាទឹកដីមួយផ្នែកធំ ប៉ែកខាងជើងប្រទេស ។
ឆ្នាំ១៩៤៩ សម្តេច នរោត្តម សីហនុ បានប្រគល់តំបន់យោធាស្វ័យ័តសៀមរាប ឲ្យ ដាប ឈួន ឆ្នាំ១៩៥២ ដាប ឈួន បានចូលរួមយ៉ាងសកម្មជាមួយ សម្តេច សីហនុ ក្នុងប្រតិបត្តិការយោធា កំចាត់ពួកបះបោរ។
ឆ្នាំ១៩៥៥ ដាប ឈួន បានសម្លាប់ កៅតក់ អតីតខ្មែរឥស្សរៈដូចគ្នា ពេលឃោសនាបោះឆ្នោតជាបេក្ខជន តំណាងរាស្ត្រ មណ្ឌលក្រឡាញ់ ពួក ។
ឆ្នាំ១៩៥៦ ដោយមានការតែងតាំងពីព្រះបាទនរោត្តម សីហនុ លោក ដាប ឈួន បានក្លាយជាចៅហ្វាយខេត្តសៀមរាប និងខេត្តកំពង់ធំ ហើយពេលនោះដែលលោកបានឲ្យគេហៅខ្លួនថា “ឈួន ម្ជុលពេជ្រ” ។
ពីថ្ងៃទី៩ ខែមេសា ឆ្នាំ១៩៥៧ ដល់ថ្ងៃទី២៦ ខែកក្កដា ឆ្នាំ១៩៥៧ សម្តេច នរោត្តម សីហនុ បានតែងតាំង លោក ដាប ឈួន ជាទេសរដ្ឋមន្ត្រី ទទួលសន្តិសុខជាតិ និង ធម្មការ ។
នៅថ្ងៃទី២១ ខែកុម្ភៈ ឆ្នាំ១៩៥៩ លោក ដាប ឈួន ជាប់ឈ្មោះថា ក្បត់នឹងសម្តេចព្រះបាទនរោត្តម សីហនុ ត្រូវបានបាញ់សម្លាប់ ដោយកូនទាហានរបស់គាត់ ។ ក្នុងការឆែកឆេរលំនៅដ្ឋានលោក ដាប ឈួន គេរកឃើញមាសចំនួន ២៧០គីឡូក្រាម ជាតំលៃក្បត់ជាតិ ដែល សេអ៊ីអា បានផ្តល់ឲ្យគាត់តាមរយៈបុគ្គលិក ទូតយួនខាងត្បូង ឈ្មោះ ង៉ោ ទ្រុងហ៊ាវ ៕
Post a Comment