រកឃើញមូលហេតុពិតដែលបណ្តាលឲ្យមានការចាប់ម៉ូតូធំហើយ ដោយ លោកចេវ ហាក់ ចេញបញ្ជាក់តែម្តង

ការបង្ក្រាបម៉ូតូកែច្នៃជាពិសេសចំពោះម៉ូតូតូចធំដែលមានសម្លេងលាន់ឮខ្លាំងៗដោយនគរបាលនៃស្នងការរាជធានីភ្នំពេញបន្តបន្ទាប់កន្លងមកនេះ មានអ្នកគាំទ្រនិងមានអ្នកថ្នាំងថ្នាក់ ដោយសារនគរបាលដែលជាអ្នកអនុវត្តន៍បានធ្វើលើសពីបទបញ្ជា។

ជាការពិតអ្នកណាក៏មិនពេញចិត្ត ចំពោះសម្លេងម៉ូតូដែលគេបានកែច្នៃបំពុងសឺម៉ាំងឲ្យលាន់ឮទ្រហឹងពេញផ្លូវនៅក្នុងទីក្រុងដែរ ។ អ្នកប្រើប្រាស់ម៉ូតូមានសម្លេងឮរំពងពេញដងផ្លូវនេះតែងតែរោទ៍ម៉ាស៊ីនម៉ូតូរបស់ខ្លួនយ៉ាងខ្លាំងនៅកន្លែងចង្អៀតឬផ្លូវមានមនុស្សអ៊ូអរដើម្បីអោយគេចាប់អារម្មណ៍ តែវាបែរធ្វើឲ្យមានសម្លេងរំខានដល់អ្នកដទៃ ខណៈម៉ូតូទាំងនោះដែលមិនសូវមានល្បឿនទៅមុខសោះ។

នគរបាលគ្រប់ខណ្ឌក្នុងរាជធានី បានបង្ក្រាបម៉ូតូដែលមានសម្លេងខ្លាំងៗតាមបទបញ្ជារបស់អ្នកលើ ដោយមានហេតុផលកែច្នៃខុសលក្ខណៈបច្ចេកទេសត្រូវបង្ក្រាប ។ តែការបង្ក្រាបមួយរយៈកន្លងទៅនេះសមត្ថកិច្ចខ្លះបានធ្វើលើសនាំឲ្យមានការថ្នាំងថ្នាក់ពីម្ចាស់ម៉ូតូមួយចំនួន ពិសេសជនបរទេសដែលភាគច្រើនបានប្រើប្រាស់ម៉ូតូធំក្នុងការធ្វើដំណើរ។

អ្នកប្រតិកម្មនឹងការបង្ក្រាបម៉ូតូកែច្នៃបំពុងសម្លេងបានលើកឡើងថា ម៉ូតូធំខ្លះមិនបានកែច្នៃបំពង់សម្លេងទេតែក៏ត្រូវនគរបាលឃាត់ម៉ូតូរបស់គេទុក ។ ម៉ូតូសេរីថ្មីៗចុងក្រោយដែលមានកម្លាំងលើសពី១២០០សេសេ មានសម្លេងខ្លាំងតែមិនដូចសម្លេងសឺម៉ាំងកែច្នៃនោះទេ។

លោកចេវ ហាក់ ប្រធានការិយាលយ័ចរាចរណ៍ជើងគោកនៃស្នងការនគរបាលរាជធានីភ្នំពេញបានប្រាប់រស្មីកម្ពុជា នៅព្រឹកថ្ងៃទី៧ខែតុលាឆ្នាំ២០១៧ថាការត្រួតពិនិត្យម៉ូតូកែច្នៃកន្លងមកម៉ូតូដែលបំពាក់ដោយសឺម៉ាំងដើមមិនបានឃាត់ទេ យើងអាចដឹងសឺម៉ាំងសុទ្ធឬមិនសុទ្ធតាមរយៈការឆែកលើហ្គូហ្គលដើម្បីឲ្យដឹងថាម៉ូតូប្រភេទណាប្រើសឺម៉ាំងអីចៀសវាងការឃាត់ទុកច្រឡំ។

ប្រធានការិយាលយ័ខាងលើបានឲ្យដឹងទៀតថាកន្លងទៅយើងបានឃាត់ម៉ូតូដែលមានសឺម៉ាំងដើមដោយសារគេបានដោះសំបុក(ឧបករណ៍បន្ថយសម្លេង)ចេញ ដើម្បីឲ្យម៉ាស៊ីនរត់ធូរមិនសូវស៊ីប្រេង តែមានសម្លេងខ្លាំង។ អ្នកប្រើម៉ូតូបែបនេះយើងបានធ្វើការអប់រំហើយប្រគល់ម៉ូតូឲ្យវិញ។ ឯម៉ូតូខ្លះមានសឺម៉ាំងត្រឹមត្រូវតែគ្មានពន្ធនាំចូលមិនបានដោះលែងទេ គឺឲ្យបង់ពន្ធសិន។

ចំណែកលោកវរៈសនីយប៉ែន ឃុន នាយរងការិយលយ័ចរាចរណ៍ជើងគោកនៃស្នងការនគរបាលរាជធានីភ្នំពេញបានប្រាប់រស្មីកម្ពុជានៅថ្ងៃទី៧ខែតុលាថា ម៉ូតូដែលបានឃាត់ក្នុងខែកញ្ញានៅទូទាំងរាជធានីភ្នំពេញមានចំនួន ៤២៨គ្រឿង ដែលក្នុងនេះមានម៉ូតូគ្មានស្លាកលេខនិងម៉ូតូបំពាក់ឧបករណ៍ខុសលក្ខណៈបច្ចេកទេស។

មន្ត្រីខាងលើបានឲ្យដឹងទៀតថានៅក្នុងចំណោមម៉ូតូទាំង៤២៨គ្រឿង មានបំពាក់ឧបករណ៍ខុសលក្ខណៈបច្ចេកទេសចំនួន១៣១គ្រឿង និង ម៉ូតូគ្មានស្លាកលេខ២៩៧គ្រឿង ។ ម៉ូតូដែលមានម្ចាស់ចូលមកដោះស្រាយរួចបានចំនួន៣០២គ្រឿងក្នុងនេះមានម៉ូតូត្រូវបំពេញបែបបទធ្វើស្លាកលេខចំនួន២១៧គ្រឿង ម៉ូតូបំ ពាក់ឧបករណ៍ខុសលក្ខណៈបច្ចេកទេសចំនួន៨៥គ្រឿង។ ម៉ូតូដែលមិនទាន់បានដោះស្រាយមានចំនួន ១២៦គ្រឿងក្នុងនេះ មានម៉ូតូអត់ពន្ធចំនួន ៥គ្រឿងម៉ូតូមានស្លាកលេខមិនប្រក្រតីចំនួន១៥គ្រឿង៕