ឧកញ្ញ៉ា ម៉ុង ឬទ្ធី នឹងផលិតរោងចក្រកែច្នៃសាច់សត្វធំបំផុតនៅកម្ពុជា ប្រជែងទីផ្សារប្រទេសជិតខាង

ជាដំណឹងមួយល្អបំផុតសម្រាប់ពលរដ្ឋពិសេស កសិករកម្ពុជា ព្រោះលោកឧកញ្ញ៉ា ម៉ុង ឬទ្ធី បានសហការចាប់ដៃគូនឹងក្រុមហ៊ុនប្រទេសប៉ូឡូញមួយ ក្នុងការបង្កើតរោងចក្រផលិតនិងកែច្នៃសាច់ ដើម្បីទប់ស្កាត់ក៏ដូចជាកាត់បន្ថយការនាំចូលសាច់សត្វរស់ ពីប្រទេសក្បែរខាងកម្ពុជា។
ទំព័រហ្វេសប៊ុកលោកឧកញ្ញ៉ា ម៉ុង ឬទ្ធី បានអះអាងថា បច្ចុប្បន្នកម្ពុជាកំពុងរងគ្រោះយ៉ាងខ្លាំង ដោយសារមិនអាចប្រជែងនឹងទីផ្សារនាំចូលសាច់ជ្រូក មាន់ពីសំណាក់ប្រទេសជិតខាងបានឡើយ ដោយសារបច្ចេកទេសផលិតនិងកែច្នៃសាច់សត្វរបស់កម្ពុជានៅខ្សោយខ្លាំង។ដូច្នេះតាមរយៈការសហការជាដៃគូគ្នានឹងក្រុមហ៊ុនជំនាញកែច្នៃសាច់មួយនៅប៉ូឡូញ ថ្ងៃខាងមុខដ៏ឆាប់ កម្ពុជានឹងមានរោងចក្រកែច្នៃសាច់សត្វទំនើប និងមានគុណភាពខ្ពស់ ដែលអាចនាំចេញនិងផ្គត់ផ្គង់សាច់សត្វបានយ៉ាងច្រើនលើទីផ្សារ។លោកឧកញ្ញ៉ាល្បីផ្នែកកសិកម្មរូបនេះ តែងតែរិះរកគ្រប់មធ្យោបាយ ដើម្បីធ្វើឲ្យផលិតផលកសិកម្មរបស់ពលរដ្ឋកម្ពុជា មានទីផ្សារគ្រប់គ្រាន់ ដើម្បីដោះស្រាយនិងបង្កើនកម្រិតជីវភាពប្រជាជន។ ជាក់ស្តែងនៅសប្តាហ៍ក្រោយលោកឧកញ្ញ៉ានឹងនាំគណប្រតិភូកម្ពុជាទៅទស្សនកិច្ចប្រទេសបារាំងនិងហុងគ្រី ក្នុងគោលបំណងរកទីផ្សារសម្រាប់ផលិតផលកសិកម្មកម្ពុជា៕