ពិតជាអស្ចារ្យមែន !សាំងហ្គាពួមានទំហំផ្ទៃដីតែ 716,1គ.ម ក្រឡាតែជាប្រទេសសុីវីល័យលើលោក និងមានចំណូលលេខ 3លើលោក
សិង្ហបុរីគឺជារដ្ឋអធិបតេយ្យភាពមួយស្ថិតនៅតំបន់អាស៊ីអាគ្នេយ៍។ ប្រទេសនេះសណ្ដូកតាមឧបទ្វីបម៉ាឡេ នៅភាគខាងត្បូង និងស្ថិតនៅលើចម្ងាយ១៣៧គ.ម ភាគខាងជើងនៃតំបន់អេក្វាទ័រ។ សិង្ហបុរីគឺជាប្រទេសមួយមានរាង៤ជ្រុងព្នាយស្មើ និងមានកោះតូចៗចំនួន៦០។ ប្រទេសត្រូវបានបែងចែកដាច់ពីប្រទេសម៉ាឡេស៊ី ដោយច្រកទ្វារសមុទ្រចាហ័រនៅភាគខាងជើង កាត់ផ្ដាច់ពីកោះរ៉ៅរបស់ប្រទេសឥណ្ឌូណេស៊ីដោយទ្វារសមុទ្រសាំងហ្គាពួរនៅភាគខាងត្បូង។ ស្ថិតនៅលើផ្ទៃដី៧១៦.១គ.មក្រឡាសិង្ហបុរីជាប្រទេសសម្បូរដោយព្រៃឈើផងដែរ និងមានទីក្រុងសាំងហ្គាពួរជារដ្ឋធានី ហើយបច្ចុប្បន្នគ្រប់គ្រងដោយលោកប្រធានាធិបតីតូនី តាន់កេងយ៉ាំ និងលោកលី សៀនលូង ជានាយករដ្ឋមន្ដ្រី។
ចាប់តាំងពីក្រុមអធិរាជបានមកតាំងលំនៅលើទឹកដីនេះនៅសតវត្សរ៍ទី២នៃគ.ស មកសឹង្ហបុរីនាសម័យទំនើប(សាំងហ្គាពួរ) ត្រូវបានបង្កើតឡើងនៅក្នុងឆ្នាំ១៨១៩ ដោយរដ្ឋបុរសអង់គ្លេសលោកស្ទេមហ្វ័ដ រ៉ាហ្វហ្វល ។ រដ្ឋបុរសស្ទេមហ្វ័ដ ដណ្ដើមរដ្ឋអធិបតេយ្យភាពលើកោះនេះនៅក្នុងឆ្នាំ១៨២៤ ហើយសឹង្ហបុរី បានក្លាយជាតំបន់អាណានិគមរបស់អង់គ្លេស នៅក្នុងឆ្នាំ១៨២៦។ ដោយកាន់កាប់ដោយប្រទេសជប៉ុននៅអំឡុងសង្គ្រាមលោកលើកទី២ សិង្ហបុរីបានប្រកាសឯករាជ្យជាតិពីចក្រភពអង់គ្លេសនៅ១៩៦៣ ហើយបានរួបរួមជាមួយដែនដីផ្សេងទៀតដើម្បីបង្កើតរដ្ឋម៉ាឡេស៊ី។ ចាប់តាំងពីពេលនោះមកសិង្ហបុរី បានរីកចម្រើនយ៉ាងឆាប់រហ័សរហូតដល់គេទទួលស្គាល់ថា ជាប្រទេសស្ថិតនៅក្នុងចំណោមកូនខ្លាទាំង៤ប្រចាំនៅអាស៊ី។
សិង្ហបុរីស្ថិតនៅក្នុងចំណោមប្រទេសពាណិជ្ជកម្មឈានមុខគេរបស់ពិភពលោកដោយប្រទេសមួយនេះគឺជាមជ្ឈមណ្ឌលហិរញ្ញវត្ថុធំបំផុតទី៤ និងមានកំពង់ផែសមុទ្រដ៏មមាញឹកបំផុត។ សេដ្ឋកិច្ចប្រទេសនេះពឹងផ្អែកទាំងស្រុងលើពាណិជ្ជកម្មពិសេសគឺចង្វាក់ផលិតកម្មផលិត។ សិង្ហបុរីជាប្រទេសរកប្រាក់ចំណូលខ្ពស់បំផុតទី៣របស់ពីភពលោកផងដែរ ជាមួយនឹងស្ដង់ដារអន្ដរជាតិលើវិស័យងប់រំសុខាភិបាលភាពស្អាតស្អំរបស់រដ្ឋាភិបាល និងការប្រកួតប្រជែងផ្នែកសេដ្ឋកិច្ច។ វិស័យយោធារបស់ សិង្ហបុរីក៏មានការជឿនលឿនខ្លាងណាស់ដែរ ពោលគឺរដ្ឋាភិបាលបានចំណាយថវិកា ៤.៩ភាគរយ នៃប្រាក់ចំណូលជាតិលើប្រព័ន្ធយោធានេះ។
សិង្ហបុរីប្រកាន់យកបែបសាធារណរដ្ឋអាស្រ័យរដ្ឋធម្មនុញ្ញហើយគណបក្ស People’s Action Party ឈ្នះរាល់ការបោះឆ្នោតចាប់តាំងពីឆ្នាំ១៩៥៩មក។ ប្រជាជនជាង៥លាននាក់កំពុងរស់នៅក្នុងប្រទេសសិង្ហបុរី ក្នុងនោះមាន២លាននាក់កើតនៅបរទេស។ សិង្ហបុរីគឺជាប្រទេសជីវចម្រុះពូជសាសន៍ដែល៧៥ភាគរយនៃចំនួនប្រជាជនរបស់ពួកគេគឺជាជនជាតិចិនហើយអ្នកដែលនៅសល់ជាកូនកាត់ មាឡេ ឥណ្ឌា អ៊ីរ៉ាស៊ាន ព្រមទាំងជនជាតិដ៏ទៃជាច្រើនទៀតជាហេតុធ្វើឲ្យប្រទេសនេះ និយាយភាសាចំនួន៤គឺអង់គ្លេស ម៉ាឡេ ចិន និងតាមិល។ សិង្ហបុរីគឺជាប្រទេសសមាជិកអាស៊ានផងដែរ។
សិង្ហបុរីជាគោលដៅដ៏ទាក់ទាញមួយសម្រាប់ភ្ញៀវទេសចរជាតិ និងអន្ដរជាតិ ដែលនៅទីនេះមានទាំងឧទ្យានជាតិ រហូតដល់សារមន្ទីរនិងសំណង់អាគារបុរាណដែលនៅសេសសល់ពីសម័យអាណានិគមអង់គ្លេស។
ឆកសមុទ្រម៉ារីណាគឺជាគោលដៅដ៏ទាក់ទាញបំផុតសម្រាប់ភ្ញៀវទេសចរ។ ទ្រង់ទ្រាយ និងទីតាំងឆកសមុទ្រម៉ារីណា បានធ្វើឲ្យទីនេះក្លាយជាឋានសួគ៌មួយមិនមែនសម្រាប់ភ្ញៀវទេសចរដែលរស់នៅក្នុងប្រទេសសិង្ហបុរីមួយប៉ុណ្ណោះទេ តែសម្រាប់ភ្ញៀវទេសចរគ្រប់រូបមកពីទូទាំងពិភពលោកផងដែរ។ អ្វីដែលពិសេសបំផុតនៅទីនេះគឺរមណីយដ្ឋានឆ្នេរខ្សាច់ឆកសមុទ្រម៉ារីណា ដែលគេសង់ឡើងនៅលើដំបូលអគារដ៏ខ្ពស់សន្លឹមមើ់លឃើញជើងមេឃ និងទេសភាពដល់អស្ចារ្យនៃទីក្រុងសាំងហ្គាពួរ។ រមណីយដ្ឋានដ៏ប្រណីតនេះសង់ឡើងនៅលើដំបូលសណ្ឋាគារ២.៥៦១បន្ទប់ និងមានសាលប្រជុំ រោងមហោស្របភាពយន្ដជាច្រើនទៀត។ ប៉ុន្ដែអ្វីដែលធ្វើឲ្យរមណីយដ្ឋាននេះខុសប្លែក និងអស្ចារ្យពីកន្លែងកម្សាន្ដដទៃនៅត្រង់ថា វាមានអាងហែលទឹកទំហំយក្សមួយនៅលើដំបូលអាគារតែម្ដង។ ដោយឡែកឧទ្យានសឹង្ហបុរីមឺឡាយអឺន(Merlion Park) ស្ថិតនៅចំកណ្ដាលឆកសមុទ្រម៉ារីណា ហើយក៏ជាតំបន់ទេសចរណ៍ដ៏សំខាន់មួយនៅក្នុងប្រទេសសិង្ហបុរីផងដែរ។ នៅក្នុងឧទ្យាននេះ មានរូបសំណាកសិង្ហមឺឡាយអឺន ដែលមានក្បាលជារូបសិង្ហ និងដងខ្លួនជាត្រី និងជានិមិត្តរូបតំណាងឲ្យប្រទេសសិង្ហបុរី។ មានរូបសិង្ហបែបនេះចំនួន២នៅក្នុងឧទ្យានមឺឡាយអឺន ដែលរូបសិង្ហនិមួយៗមានកម្ពស់ចាប់ពីជិត៩ម៉ែត្រឡើងទៅ និងមានទម្ងន់៧០តោន។
កន្លែងកម្សាន្ដដ៏ទាក់ទាញជាច្រើនទៀតនៅក្នុងប្រទេសសិង្ហបុរី រួមមានសារមន្ទីរវិទ្យាសាស្ដ្រសិល្បះ(ArtScience Museum) រោងមហោស្របភាពយន្ដអ៊ីផ្លាណេដ(Esplanade Theatre) កងរង្វង់សាំងហ្គាពួរ(Singapore Flyer) សួនច្បារបូតានិក សាំងហ្គាពួរ (Singapore Botanic Gardens) និងសួនបក្សីជូរ៉ុងជាដើម៕
Post a Comment