មាននរណាគេចង់ទៅមើលអត់? ផ្ទះគំរូតម្លៃថោក និងមធ្យមដំបូងគេបង្អស់នៅកម្ពុជា ធ្វើរួចរាល់ហើយ!
អស់រយៈពេលជិត៩ខែកន្លងមកហើយ បន្ទាប់ពីគម្រោងសាងសង់លំនៅដ្ឋានសាធារណៈដែលមានតម្លៃសមរម្យលើកដំបូងគេបង្អស់នៅកម្ពុជា បានសម្រេចចិត្តបើកការសាងសង់ជាផ្លូវការកាលពីថ្ងៃទី៧ ខែមករា ដើមឆ្នាំ២០១៧។ ហូតមកដល់បច្ចុប្បន្ននេះ គម្រោងអភិវឌ្ឍលំនៅដ្ឋានតម្លៃថោកនិងមធ្យមមួយនេះ ត្រូវបានម្ចាស់គម្រោងប្រាប់ឲ្យដឹងថា ក្រុមហ៊ុនបានបញ្ចប់រួចរាល់ហើយនូវការរចនាផ្ទះគំរូដ៏ស្រស់ស្អាត ហើយក៏នឹងត្រៀមប្រកាសបើកជូនសាធារណជនឲ្យចូលទៅទស្សនាឆាប់ៗនេះផងដែរ។
នេះជាគម្រោងដែលបានធ្វើឲ្យរំជើបរំជួលនិងចាក់ដោតដល់បេះដូងប្រជាពលរដ្ឋទូទៅទូទាំងប្រទេស ពិសេសបុគ្គលិក មន្ត្រីរាជការ កងកម្លាំងប្រដាប់អាវុធ មន្ត្រីចូលនិវត្តន៍ និងជនពិការ ដែលមានប្រាក់ចំណូលទាបនិងមធ្យម ដែលពួកគាត់តែងតែសុបិនប្រាថ្នាចង់បានផ្ទះមួយខ្នង រស់នៅដោយពិតប្រាកដ ដែលមានតម្លៃថោកសមរម្យ អស់ជាច្រើនឆ្នាំមកហើយ។
គម្រោងសាងសង់លំនៅដ្ឋានសាធារណៈតម្លៃថោកនិងមធ្យមដំបូងគេ នៅកម្ពុជានេះ មានការគាំទ្រយ៉ាងខ្លាំងពីសំណាក់មន្រ្តីរាជការនិងប្រជាពលរដ្ឋទូទៅ។ ទន្ទឹមនឹងនេះផងដែរ ក៏មានមតិពីសាធារណជនមួយចំនួនបានរិះគន់ពីគម្រោងអភិវឌ្ឍន៍មួយនេះ ដោយបានលើកឡើងថា មានភាពយឺតយ៉ាវដែលអាចធ្វើឲ្យដំណើរការសាងសង់ត្រូវអូសបន្លាយពេលយូរបន្ថែមទៀត។
លោកឧកញ៉ាបន្តថា «បើទោះបីជាស្ថិតនៅក្នុងរដូវភ្លៀងពិបាកធ្វើការក៏ពិតមែន ប៉ុន្តែ ក្រុមហ៊ុនកំពុងតែពន្លឿនដំណើរការសាងសង់យ៉ាងសស្រាក់សស្រាំ ដោយបានរៀបចំហេដ្ឋារចនាសម្ព័ន្ធ ចាក់ដីបំពេញការដ្ឋានដែលជាវាលទំនាបឲ្យស្មើនឹងផ្លូវជាតិ»។ លោកឧកញ៉ាបន្តថា «អ្វីៗយើងធ្វើទៅតាមផែនការ សូមឲ្យប្រជាជនអត់ធ្មត់រង់ចាំបន្តិច។ យើងនឹងបានលំនៅដ្ឋានមួយពិតប្រាកដដែលមានគុណភាព»។
លោកឧកញ៉ា សៀ ឫទ្ធី ប្រធានក្រុមប្រឹក្សាភិបាលក្រុមហ៊ុន Worldbridge Land បានបញ្ជាក់អះអាងថា ដើម្បីមានសិទ្ធិទទួលបានផ្ទះតម្លៃសមរម្យនេះ ពលរដ្ឋខ្មែរ ពិសេស មន្រ្តីរាជការត្រូវតែបំពេញលក្ខខណ្ឌសំខាន់ៗមួយចំនួន ដូចជា៖
1. ជាពលរដ្ឋដែលមានចំណូលទាបនិងមធ្យម ក្រោម ៥០០ដុល្លារ ជាបុគ្គលដែលរៀបការហើយ ទិញហើយមិននៅមិនអាចយកទៅជួលនិងលក់បន្ដ លុះត្រាតែ៥ឆ្នាំក្រោយ ទើបអាចជួលនិងលក់បន្ដបាន។
2. មិនអនុញ្ញាតឲ្យអ្នកមានលុយទិញទុកសម្រាប់ធ្វើអាជីវកម្មនោះទេ។
3. រាល់ការទទួលទិញលក់និងកក់ ក្រុមហ៊ុននិងក្រសួងរៀបចំដែនដី នគរូបនីយកម្ម និងសំណង់ ជាអ្នកពិនិត្យដោយផ្ទាល់។
4. តម្លៃផ្ទះចាប់ពី ២ម៉ឺន ៥ពាន់ដុល្លារ ទៅ ៣ម៉ឺនដុល្លារ អាស័្រយទៅតាមប្រភេទផ្ទះនិងទំហំ។
Post a Comment